Beta berjuang sebisanya. Beta punya pacar yang beta sayang sekali. Katong pacaran sudah 7 tahun, dari SMA. Dia cita-cita mau jadi perawat. Beta memutuskan untuk sonde kuliah, demi kerja lalu bantu biayai dia pung kuliah.
Awalnya beta juga berat karena beta terpaksa harus kubur impian jadi guru, tapi karena beta paling cinta dia, makanya beta relakan impian itu terbawa arus dan waktu. Waktu lulus sekolah, katong doa janji, tetap sama-sama sampai kawin.
Dia akhirnya kuliah di jawa. Beta kerja, siang malam. Biar lelah, beta sonde mau kalah, karena beta percaya, ada dia di sana juga yang sonde menyerah buat belajar keras. Tiap malam katong baku telpon, baku kasi ingat dan berdoa sama-sama. Dia carita soal dunia kampus. Beta dengar deng senang dan beta berharap dia bae-bae saja.
Samua kebutuhan yang dia minta, mau itu uang kuliah, pakian, makan, kecantikan, beta berusaha siapkan semua. Tiap bulan beta kirim uang. Beta pastikan, beta pung pacar sonde boleh kekurangan, biarpun beta di sini kerja deng kelelahan. Kalau dia sanang, beta ju rasa senang.
Sisa beberapa bulan dia wisuda, beta semakin bahagia karena sonde lama lai katong bisa nikah. Jalan panjang yang katong lalui sama-sama, tinggal hitung waktu saja su bisa lewati semua. Lalu, dua bulan menuju wisuda, dia mulai ilang kabar. Kadang chat, kadang sonde. Kalau telepon, dia alasan sibuk. Bahkan katong su sonde bisa video call lai.
Ya sudah, beta pikir dia sibuk persiapan wisuda. Jadi beta berusaha berpikir positif. Pas dekat beberapa hari mau wisuda, dia masih minta uang untuk acara. Beta kirim juga. Tiba waktu wisuda, beta mau datang, jadi beta telepon dia, tapi dia sonde angkat telepon. Besoknya dia bilang, nanti acara di kampung, jadi tunggu saja di kampung. Beta senang sekali karena nona mau pulang.
Hari yang beta tunggu akhirnya tiba. Acara wisuda di kampung. Beta su mandi, sudah ganti gagah-gagah, bawa dia kado deng rindu yang bertahun-tahun beta tampung di dada. Beta pakai baju terbaik yang beta punya dan sebelum pigi beta berdoa. Sampai di dia pung rumah, beta sonde sanggup untuk masuk. Di teras, dia su gandeng laki-laki satu. Laki-laki berseragam. Beta tanya di orang-orang kampung, itu sapa? Dong bilang itu, nona pung tunangan.
Pas dengar kata “tunangan” beta sonde bagara. Beta hanya tatap dia dari muka pagar. Dia pas lia beta, dia putar muka. Beta aer mata jatuh. Kira cuma setetes, ternyata jatuh baku iko. Beta butuh nyali untuk angka kaki dari dia pung rumah. Rindu yang su mau beta lapas, beta kasmaso ulang. tiba tiba barubah jadi luka, racun. Beta coba seka aer mata yang tagantung di dagu. Beta mau percaya ini mimpi, tapi sonde mungkin mimpi sesakit ini.
Jadi, beta pulang. Sepanjang jalan, beta putar samua kenangan dan janji yang dia bilang.
Beta ingat samua kerja keras bertahun-tahun, yang susah, sengsara, demi dia. Beta ingat betapa bodohnya beta, kubur impian demi bahagiakan dia yang kini bahagiakan orang lain. Sampe di rumah, beta pung mama tunggu di teras. Beta masuk dan mamtua tanya beta. Mamtua bilang, “sonde apa-apa anak, Tuhan su taruh anak punya di lain, mungkin bukan anak pung jodoh, Kasi kuat hati. Cari jalan, kuliah atau karja, lalu hidup bae-bae.”
Beta tau, mama berusaha hibur beta. Beta pun mau balas dendam, tapi bukan balas dendam par dia. Beta mau balas dendam par diri sandiri yang terlalu bodoh untuk mencintai orang yang salah.
“Kawan, habis bacerita ini, beta cuma mau bilang, lu hebat! Lu buktikan bahwa laki-laki tulus di zaman ini masih ada. Dan, lu sama sekali sonde kalah. Lu menang, karena berhasil terlepas dari orang yang salah. Samua yang lu buat, itu cinta dan samua yang dia balas, itu dusta. Toh, sonde masalah. Lu tetap di jalan yang benar dan sayangnya dia, melepaskan satu-satunya mutiara paling indah di dunia.”
Sabtu 22 Maret 2025
Penulis : -JuandJuanna-
